Primary tabs

“ဘုန်းတန်းခိုးကြီးမားခြင်းကို ဖွင့်ဆို သော ပတ္တမြား”

မြန်မာ့မိုးကုတ်မြေမှ ထွက်ရှိသော အဖိုးတန် ကျောက်မျက်ရတနာများတွင် မြန်မာ့ပတ္တမြားသည် ကမ္ဘာပေါ်တွင် အရည်အသွေး အကောင်းဆုံး၊ အရှားပါးဆုံးနှင့် တန်ဖိုးအနဂ္ဃကြီးမားဆုံးသော ကျောက်မျက်ရတနာဟု ကမ္ဘာ့ကျောက်မျက်ပညာရှင်အသီးသီးက လက်ခံထားကြသည်။ 

စိန်သည် မက်မောထိုက်သော ရတနာပင် ဖြစ်လင့်ကစား ယခုအခါတွင် စိန်သည် ငွေရှိပါက အလွယ်တကူ ဝယ်ယူနိုင်ပြီး အရည်အသွေးကောင်းမွန်၍ ရှားပါးသော ပတ္တမြားကိုမူ အလွယ်အကူဝယ်ယူ၍ မရနိုင်သောကြောင့် ဖြစ်သည်။ မြန်မာ့ပတ္တမြားမှာမူကား ငွေပေး၍ဝယ်သည့်တိုင်အောင် ရှားပါးသောကြောင့် ကမ္ဘာ့ဈေးကွက်တွက် အရှားကြီးရှားနေသော ကျောက်မျက်ရတနာ ဖြစ်သည်။ ပတ္တမြား ကျွမ်းကျင်သူ ဂျက်အေဘရာဟမ် ဆိုသူက ပတ္တမြားကျောက်ကြီး ကျောက်ကောင်း
များသည် စိန်ထက်အဆ (၃၀) မှ (၅၀) အထိ ပိုမိုရှားပါးကြောင်း၊ ဈေးနှုန်းတွင်လည်း (၁၀)ကရက်ကျော်သာ ထိပ်တန်းပတ္တမြား ကျောက် ကောင်းတစ်ပွင့်သည် (၁)ကရက်လျှင် ဒေါ်လာ (၃)သိန်း ဈေးနှုန်းအထက်ပင် ပို၍ရနိုင်ကြောင်း၊ အပြစ်အနာအဆာကင်းသည့် စိန်များအနေဖြင့် ထိုဈေးနှုန်း၏ လေးပုံတစ်ပုံခန့်ကိုသာ ရနိုင်ဖွယ်ရှိသည်ဟု ဆိုသည်။ 

ပတ္တမြား (Ruby) ဟူသော ဝေါဟာရသည် ဂရိဝေါဟာရ Anthrax နှင့် ဆက်စပ်ပြီး ဖြစ်ပေါ်လာသည်ဟု ဆိုသည်။ အဆိုပါ  ဂရိဝေါဟာရမှာ တောက်ပနေသော သွေးရောင်ဟု အဓိပ္ပါယ်ရသည်။ ဟိန္ဒူလူမျိုးတို့မှာ ပတ္တမြားကို ပထမဦးဆုံး အသုံးပြုခဲ့သူများ ဖြစ်သည်။ ၎င်းတို့သည် ပတ္တမြားကျောက်ကို အလွန်မြတ်နိုး၍ ကျောက်မျက်အားလုံး၏ အကြီးအကဲဟု သတ်မှတ်ကြသည်။ ကျောက်သားအတွင်း၌ မီးရှိသောကြောင့် ပတ္တမြားအရောင်တောက်ပနေခြင်း ဖြစ်သည်ဟု ယုံကြည့်ကြပြီး ဝတ်ဆင်ခြင်းဖြင့် ကျန်းမာရွှင်လန်းခြင်းကို ဖြစ်စေသည်ဟုဆိုသည်။ အနောက်တိုင်းတွင်မူ အမျိုးသမီးများဝတ်ဆင်ခြင်းဖြင့် ယောက်ျားများအပေါ် ပို၍ဆွဲဆောင်နိုင်သော စွမ်းအားကိုဖြစ်စေသည်ဟု ယုံကြည်ကြသည်။ အိန္ဒိယတိုင်းသားအချို့ကမူ ပတ္တမြားကို လှူဒါန်းခြင်းဖြင့် တမလွန်ဘဝတွင် ဘုရင်ဧကရာဇ်ဖြစ်နိုင်သည်ဟု ယုံကြည်ကြသည်။ ပတ္တမြားသည် ပိုင်ဆိုင်သူအား ကိုယ်စိတ်နှစ်ပါးငြိမ်းချမ်း၍ ဥစ္စာစည်းစိမ်ကို ရန်သူမျိုးငါးပါး နှောင့်ယှက်ဖျက်ဆီးခြင်းမှ ကာကွယ်ပေးသည်ဟု ဆိုသည်။ 

မြန်မာ့စာပေတွင် ပတ္တမြားနှင့်ပတ်သတ်၍လည်း ပတ္တမြားမှန်လျှင် နွံမှာနစ်စေတော့၊ မညစ်ပါတဲ့ ဒီအရောင်၊ တိုးလို့သာပြောင်ဟု တစ်မျိုး၊ ရော့ ပတ္တမြား ရော့ နဂါး၊ ပတ္တမြားဆန်ကြိုး၊ အဖိုး ပြည်တန်ဟူ၍ အမွှန်းတင် ထည့်သွင်းရေးသားကြသည်။ မြန်မာ့ပတ္တမြား ငမောက်မှာလည်း ကမ္ဘာကျော်ထင်ရှားသော ကျောက်မျက်ဖြစ်ပြီး ငမောက်၏ သမိုင်းမှာလည်း မြန်မာလူမျိုးများအား တသသဖြစ်နေရန် ဆွဲဆောင်နေဆဲဖြစ်သည်။ ဓာတ်ဖွဲ့စည်းမှု ပတ္တမြားနှင့် နီလာတို့မှာ အလူမီနီယမ် အောက်ဆိုဒ် ခရစ္စတယ်ပုံဆောင်ခဲများဖြစ်ပြီး သန့်စင်သော အလူမီနီယမ်အောက်ဆိုဒ်စစ်စစ်မှာ အရောင်အဆင်းမရှိပေ၊ တိုက်တေနီယမ်နှင့် သံအနည်းငယ်ရောနှောသောကြောင့် အနီရောင်ဖြစ်လာသည်။ ခရိုမီယမ်အနည်းငယ်နှင့် ထိတွေ့သောအခါ ပန်းရောင်ဖြစ်လာပြီး သံချည်းသက်သက် ရောနှောပါဝင်သောအခါ အဝါရောင်နှင့် အစိမ်းရောင်၊ ခရိုမီယမ်နဲ့သံတို့ထိတွေ့သောအခါ လိမ္မော်ရောင် ဖြစ်လာပါသည်။ ထိုအဆင့်ထိ ၎င်းကျောက်မျက်များကို နီလာဟုသာ သတ်မှတ်ကြပြီး အလူမီနီယမ် အောက်ဆိုဒ်ခရစ္စတယ်တွင် ခရိုမီယမ် လုံလောက်စွာ ပါဝင်သောအခါ အနီရောင်ရှိလာပြီး ထိုအနီရောင်ကျောက်များကိုသာ ပတ္တမြားဟုခေါ်ဆိုကြခြင်း ဖြစ်ပါသည်။ ထို့ကြောင့် ပတ္တမြားနှင့် နီလာတို့သည် မိခင်ကျောက်မျက်တစ်မျိုးထဲမှ ပေါက်ဖွားလာသော ညီအစ်ကိုကျောက်မျက်များဟု ဆိုနိုင်သည်။ 

ပတ္တမြားသည် စိန်ပြီးလျှင် မာခြင်းအဆင့် (၉)ရှိပြီး သိပ်သည်းဆမှာလည်း စိန်ထက်ပိုများသောကြောင့် အလေးချိန်ရှိသော ကျောက်ဖြစ်သည်။ မြန်မာ့သမိုင်းတွင် ပတ္တမြားငမောက်ဟုဆိုလျှင် မြန်မာတိုင်းသိကြပြီး မြန်မာဘုရင်များ အစဉ်အဆက် တန်ဖိုးထားခဲ့သော ယင်းကျောက်မျက်အား မိုးကုတ်မြို့ အင်ကြင်းတောင်မှရရှိခြင်းဖြစ်သည်ဟု ဆိုကြသည်။ မှတ်တမ်းအရဆိုလျှင် ချင်းတွင်းနယ်သား ငမောက်ဆိုသူမှ ဆက်သခြင်းကြောင့် ပတ္တမြားငမောက်ဟု ထင်ရှားကျော်ကြားခြင်းဖြစ်သည်။ ကမ္ဘာပေါ်တွင် အကောင်းဆုံးပတ္တမြားမှာ မိုးကုတ်မှထွက်ရှိသော ပတ္တမြားများဖြစ်ပြီး အိန္ဒိယမှမဟာရာဂျာများ၊ ပါရှားဘုရင်များ၊ တူရကီမှ စူလတန်ဘုရင်များ စုဆောင်ထားသော အဖိုးထိုက်တန်သော ပတ္တမြားများမှာ မိုးကုတ်မှထွက် သော ကျောက်မျက်များဖြစ်သည်။ မြန်မာနိုင်ငံ မိုးကုတ်မှ ထွက်သောပတ္တမြားအရောင်သည် ယေဘုယျအားဖြင့် လည်သီးရောင်အနီဖြစ်သည်၊ ယိုးဒယားမှထွက်သော ပတ္တမြားမှာမူ သံဓာတ်ပါရှိသဖြင့် ကြက်သဲအနီရောင်ရှိ၍ ဈေးကွက်တွင် မတွင်ကျယ်လှပေ။ 

မြန်မာ့ပတ္တမြားသည် ထူးခြားသော အရည်လည်ခြင်းကြောင့် တန်ဖိုးကြီးမားရခြင်း၊ နာမည်ကြီးရခြင်းဖြစ်သည်။ ပတ္တမြားကို လှည့်လည်၍ကြည့်သောအခါ အနီရင့်နှင့် လိမ္မော်နီရောင်နှစ်ရောင် ပြောင်းလဲသည်ကို တွေ့ရှိရပြီး ယင်းကဲ့သို့ဖြစ်ခြင်းကို အရည်လည်ခြင်း (သို့) နှစ်ရောင်ပြခြင်းဟု ခေါ်ခြင်းဖြစ်သည်။ ထို့ကြောင့် မိုးကုတ်ပတ္တမြားကမ္ဘာ၌ နာမည်ကြီးရခြင်းမှာ Fluorescence အနီရောင်ပါ ပေါင်းစပ်ရောနေခြင်းကြောင့် ဖြစ်သည်ဟု ကျောက်မျက်ပညာရှင် ရစ်ချစ်ဟူးစ်က ပြောခဲ့သည်။ ပတ္တမြားကျောက်မျက်သည် ဇူလိုင်လတွင်မွေးဖွားသူများ ဝတ်ဆင်ရမည့် မွေးနေ့ကျောက်အဆောင်ဖြစ်ပြီး အင်္ဂါနေ့တွေ မွေးဖွားသော အင်္ဂါသား၊ အင်္ဂါသမီးများ ဆောင်ရမည့်ကျောက်ဟုလည်း ဆိုကြသည်။ နောက်ထပ် ရှိသေးသည်မှာ အနောက်နိုင်ငံတွင် အိမ်ထောင်သက် (၁၅)နှစ်နှင့် နှစ်(၄၀)မြောက် မင်္ဂလာပွဲတွင်ပေးရသော လက်ဆောင်မွန် ကျောက်မျက်ဟုလည်း သတ်မှတ်ကြသည်။ 

ကျောက်မျက်ရတနာများထဲတွင် ပတ္တမြားသည် မိန်းမသားတို့ရဲ့ နူးညံ့တဲ့အလှကို ပိုမို တောက်ကြွ ရဲရင့်စေသယောင် ပံ့ပိုးပေးတဲ့တွင်းထွက် အဖိုးတန်တစ်မျိုးဖြစ်သည်။ ရဲရင့်သော သွေးအသွင် အနီရောင်ကို သူဆောင်သည်။ တွင်းထွက်များသည် အရည်အသွေးကောင်းလေ တန်ဖိုးကြီးလေဖြစ်ပြီး ရဲရင့်တဲ့ ပတ္တမြားအနီရောင်ကြောင့် အမျိုးသမီးတစ်ဦးရဲ့အလှကို အဖိုးမဖြတ်နိုင် ဖြစ်စေသည်။ တောက်ကြွသော ပြဒါးဓာတ်များ ကိန်းအောင်းရာမှ ပတ္တမြားဖြစ်လာသည်ဟု အယူအဆရှိသောကြောင့် ပြဒါးများဟု ခေါ်ဆိုရင်းမှ အခုချိန်တွင် ပတ္တမြားလို့ အမည်တွင်ခဲ့သည်ဟု ဆိုကြပါသည်။ ပတ္တမြား၏ အရောင်သည် အများအားဖြင့် သွေးကဲ့သို့သော အနီရောင်ဖြစ်သည်။ တွင်းထွက်ကျောက်ထဲတွင် အရည်အသွေးကောင်းပါက 
တန်ဖိုးကြီးလေသည်။ မြန်မာနိုင်ငံတွင် မိုးကုတ်ဒေသမှ အများဆုံး ထွက်ရှိသည်။ ထို့ကြောင့် မိုးကုတ်ဒေသကို ပတ္တမြားမြေဟုလည်း တင်စားခေါ်ဝေါ် ကြသည်။ 

ဓာတုဗေဒအရ ပတ္တမြားနှင့် နီလာသည် အလူမီနီယံအက်တမ် (၃)ခုနှင့် အောက်စီဂျင် အက်တမ်(၂)ခုတို့ဖြင့် ဖွဲ့စည်းထားသည့် ကိုရမ်ဒမ် (Al2O3) ဒြပ်ပေါင်းသာဖြစ်သည်။ ထိုဒြပ်ပေါင်းအတွင်းသို့ ခရိုမီယံ ဒြပ်စင်အနည်းငယ် ပါဝင်သောကြောင့် အနီရောင်အဖြစ် အရောင်ရှိနေရခြင်းဖြစ်သည်။ ပုံဆောင်စနစ်မှာ တြိဂုဏ်စနစ်ဖြစ်ပြီး ရောင်လက်အားဖြင့် ဖန်ရောင်လက်ဖြစ်သည်။ မာဆင့်မှာ (၉) ရှိပြီး သဘာဝတွင်းထွက်များအနက် စိန်ပြီးလျှင် အမာဆုံးတွင်းထွက်ဖြစ်ပါသည်။ ပတ္တမြား၏ ထူးခြားတဲ့လှပ ဆန်းကြယ်မှုမှာ ကြိုးလို့ခေါ် တဲ့ ဂေါ်ကြိုးများ ရှိခြင်းဖြစ်သည်။ ပတ္တမြား၏ အရည်အသွေးကိုလိုက်ပြီးအခေါ်အဝေါ်များ ရှိသည်။ 

ပတ္တမြားနှင့်ပတ်သက်၍ အခေါ်ဝေါ်များ လည်သီးရည်- ကြက်ဖလည်မှ ထွက်သော သွေးရောင်အနီရောင် အပြည့်ရှိသောပတ္တမြားကိုခေါ်ခြင်း၊ ငါးရှည့်သွေးရည်- ငါးရှည့်သွေးကဲ့သို့ အနီရောင်ရှိသော ပတ္တမြားကျောက်ကိုခေါ်ခြင်း၊ ခိုသွေးရည်- ပတ္တမြားကျောက်အရောင်တွင် အပြာရည်စွက်သော အရောင်ကိုခေါ်ခြင်း၊ ယုန်သွေးရည်-  ပတ္တမြားကျောက်အရောင်တွင် အ၀ါရည်စွက်သော အရောင်ကိုခေါ်ခြင်း၊ သပြေသီးရည်- ပတ္တမြားကျောက်အရောင်တွင် အပြာအညို ရော ယှက်နေသော သပြေသီးအရောင်ကိုခေါ်ခြင်း၊ ဘုံ ဘိုင်ညွန့်ရည်- နှင်းဆီပန်းအရောင် စိုစိုပြေပြေနီနီ ရဲရဲအရောင်ကို ခေါ်ခြင်း၊ ဘုံဘိုင်ရည် - လူငယ်၏ သွေးရောင်အနီရောင်ကိုခေါ်ခြင်း၊ ကျောက်တိမ်း ရည်- အနီတွင် အပြာရည်လွန်သော အရောင်ကို ခေါ်ခြင်း၊ အရည်ကျ- အနီရောင်ဖျော့သော အရောင်မျိုးကိုခေါ်ခြင်း၊ ပန်းရည်- နှင်းဆီပန်းကဲ့သို့ အရောင်မျိုးကိုခေါ်ခြင်း၊ ကြက်သဲရောင်အရည်- ညိုပုပ်ပုပ်နှင့် မည်းသယောင် အနီပုပ်ကိုခေါ်ခြင်း၊ ကြက်သွန်ဥခွံအရည်- အနီရောင်ဖျော့လျှက် အ
ဖြူရောင်ရောနေခြင်းကိုခေါ်ခြင်း၊ ထုံးကျောက်ရည် - နီသော်လည်းဖြူပြီး ခြောက်တောက်တောက် ဖြစ်နေခြင်းကိုခေါ်ခြင်း၊ ကတ္တီပါရည်- ကတ္တီပါအ ပြာရောင်ကဲ့သို့ အပြာစကဲသို့ပြာခြင်း၊ (နီလာ ကျောက်တွင်သာခေါ်ခြင်းဖြစ်သည်)။ 

ပတ္တမြား ထွက်ရှိသောနိုင်ငံများ ကမ္ဘာပေါ်တွင် တန်ဖိုးအကြီးမားဆုံး ပတ္တမြားနှင့် နီလာထွက်ရှိသည့်နိုင်ငံမှာ မြန်မာနိုင်ငံသာဖြစ်သည်။ ကမ္ဘာပေါ်မှာ အရည်အသွေး အကောင်းဆုံး ပတ္တမြားကြီးတွေ ထွက်ရှိရာနေရာဟာလည်း မိုးကုတ်မြို့
ဖြစ်သည်။ သီရိလင်္ကာ၊ ထိုင်း၊ တန်ဇန်နီးယား၊ မွန်တာနား၊ မဒါဂတ်စတား၊ အာဖဂန်နစ္စတန်၊ ပါကစ္စတန်၊ ကမ္ဘောဒီးယား၊ သြတြေးလျ၊ ကင်ညာနှင့် နိုက်ဂျီးရီးယား နိုင်ငံများတွင် ထွက်ရှိသော်လည်း ကမ္ဘာ့အဆင့်မမှီချေ။ ပတ္တမြားကိုဆောင်ရန် အချက်အလက်လေးတွေ သိဖို့လိုအပ်သည်။ ပတ္တမြားကို အဆောင်ရတနာအဖြစ် ၀တ်ဆင်မည်ဆိုရင် အပြစ်အနာအဆာရှိတဲ့ ပတ္တမြားကို မ၀တ်ဆင်သင့်။ သားသမီးနှင့်တကွ မိသားစု၊ လုပ်ငန်းနဲ့ အစစအရာရာ ပျက်စီးစေသည်ဟု ဆိုကြ၏။ 
ပတ္တမြားက အသိဉာဏ်ပွင့်လင်းမှုကို ရရှိစေပြီး ဆုံးဖြတ်ချက်ချရာမှာ အမှားအယွင်းကင်းစေသော ကြောင့် ဘုရင်တွေနဲ့ အကြီးအကဲများဟာ တန်ဖိုးထားပြီးဝတ်ဆင်လေ့ ရှိသည်။ ပတ္တမြားက နှလုံးရဲ့ ချက်ကရကို လှုံ့ဆော်နိုင်စွမ်းရှိ၍ အလိုရှိရာ ပြီးမြောက်စေနိုင်တဲ့ အစွမ်းလည်းရှိသည်။ အဖျားကြီးပြီး ကိုယ်အပူချိန် အလွန်အမင်းတက်တဲ့ သူများ ပတ္တမြားကို  လက်နဲ့ကိုင်တွယ်ထိတွေ့ထားမယ်ဆိုရင် ကိုယ်အပူချိန်ကျစေပြီး ကိုယ်တွင်းက အဆိပ်အတောက်တွေကို ဖယ်ရှားနိုင်စေသည်။ ခေါင်းအုံးအောက်ထားအိပ်ရင် အိပ်မက်ဆိုးတွေက လွတ်မြောက်စေနိုင်ကြောင်းဆိုသည်။ ထို့ကြောင့် ပတ္တမြားကို ဣစာသယ ရတနာတစ်ပါးဟု သတ်မှတ်ကြခြင်းဖြစ်သည်။ပတ္တမြားကို မြန်မာ့ထုံးထမ်း အစဉ်အလာအရ ညာဘက်လက် သူကြွယ်မှာ ၀တ်ဆင်သင့်သည်ဆိုပြီး အနောက်နိုင်ငံတွေတွင် မတော့ ဘယ်ဘက်လက်တွင် ၀တ်ဆင်ကြလေ့ရှိ ကြသည်။ န၀ရတ် ကိုးပါးလက်စွပ်တွင်လည်း ပတ္တမြားကိုအလယ်တွင်ထားပြီး အခြားရတနာများက ဘေးမှရံထားတဲ့အတွက် မည်မျှ အချက်အချာကျသလဲဆိုတာ မြင်နိုင်သည်။ ပတ္တမြားဟူသည် ချစ်ခြင်းနဲ့ ခင်မင်မှုကို ဖော်ဆောင်စေပြီး အသက်ဓာတ် နဲ့ သစ္စာရှိခြင်းဟု ဖွင့်ဆိုကြသည်။