“နားလည်မှုရှိရမယ်၊ အမြဲတမ်းချစ်နေရမယ်”

ဓာတ်ပုံ - လမင်းနိုင်

အိမ်ထောင်တစ်ခုမှာ ခင်ပွန်းဖြစ်သူရော၊ ဇနီးဖြစ်သူပါ အိမ်ထောင်ရေးသာယာဖို့အတွက် တာဝန်ရှိသူနှစ်ဦး ဖြစ်ပါတယ်။ ဇနီးဖြစ်သူတွေရဲ့ အိမ်ထောင်ရေးနဲ့ပတ်သက်ပြီး ထင်မြင်ချက်တွေ ပြောစကားတွေကို ဖော်ပြခဲ့ပြီးတဲ့နောက် အခု ခင်ပွန်းဖြစ်သူတွေ ရဲ့ အိမ်ထောင်ရေးခံယူချက်တွေကို ပရိသတ်တွေအတွက် ဖော်ပြပေးသွားမှာ ဖြစ်ပါတယ်။ ဒီလမှာတော့ တေးသံရှင်ယုဇနရဲ့ ခင်ပွန်း ကိုသိမ်းထိုက်အောင်ရဲ့ အိမ်ထောင်ရေးမိသားစုအကြောင်းကို ဖော်ပြပေးလိုက်ပါတယ်။

(အိမ်ထောင်သက် ဘယ်လောက်ရှိပြီလဲ)

အိမ်ထောင်သက်က အခုဆို(၆)နှစ်ပြည့်တော့မယ်။

(အိမ်ထောင်ကျပြီးမှ စိတ်နေစိတ်ထား သိသိသာသာပြောင်းလဲလာတာမျိုးရှိလား)

ထွေထွေထူးထူး ပြောင်းလဲတာမျိုး မရှိပါဘူး။ အသက်ကြီးလာတော့ စိတ်ကပိုရင့်ကျက်လာတယ်။ လူတိုင်းလူတိုင်းဟာ အသက်အရွယ်ရလာတာနဲ့အမျှ အတွေးအခေါ် ပြောင်းလဲလာတယ်။ အိမ်ထောင်ကျတဲ့ အချိန်ကတော့ ဘ၀ရဲ့အချိုး အကွေ့တစ်ခု ပေါ့နော်။ အဲဒီအချိန်မှာ စိတ်နေစိတ်ထား ပိုရင့်ကျက် ပြောင်းလဲလာတာပေါ့နော်။ အိမ်ထောင်ပြုတယ်ဆိုတာ ဘ၀ရဲ့အရေးကြီးတဲ့ အချက်တစ်ခုပဲလေ။ တည်ထောင်ထားတဲ့အိမ်ထောင်ရေးအတွက် တာဝန်ကျေအောင်နေတယ်။ ယောက်ျားကောင်းပီသဖို့ မိသားစု အပေါ် ဇနီးအပေါ်မှာသစ္စာရှိဖို့ တစ်ယောက်နဲ့တစ်ယောက် အဆင်ပြေအောင် နေထိုင်နိုင်ဖို့စိတ်ထဲမှာ အမြဲကြိုးစားထားတယ်။ အိမ်ထောင်မကျခင်က စိတ်မျိုးတော့ မရှိတော့ဘူးပေါ့နော်။ ကျွန်တော် အိမ်ထောင်ကျတော့ အသက်(၃၀)။ ယုနဲ့က အသက်(၂) နှစ်ငယ်တယ်။

(အိမ်ထောင်ပြုတော့မဲ့ အချိန်မှာ အိမ်ထောင်ဦးစီးတာဝန်တွေအတွက် ဘယ်လိုလေ့လာတာမျိုးရှိလဲ။)

အိမ်ထောင်ပြုတော့မယ်၊ ကိုယ်ရဲ့တာဝန်တွေကို ထမ်းဆောင်မယ်၊ ခုနကပြောသလိုပေါ့၊ မိသားစုအပေါ်မှာ တာဝန်ကျေတဲ့ သူဖြစ်အောင် ကြိုးစားမယ် ဆုံးဖြတ်ထားတယ်။ ပတ်ဝန်းကျင်မှာလည်း သေသေချာချာ လေ့လာတာမျိုးတော့ မရှိပါဘူး။ မသိစိတ်က နေပြီး လေ့လာမိတာမျိုးတွေတော့ရှိတယ်။ ပတ်ဝန်းကျင်မှာရှိတဲ့ မိသားစု။ ပတ်ဝန်းကျင်မှာ အတုယူစရာရှိတာ အတုယူတယ်။ ရှောင် ကျဉ်တာမျိုး ရှိတာတွေကို ရှောင်ကျဉ်မယ်ဆိုတာမျိုးတော့ သိထားတယ်။

(မိသားစု Plan အတွက်ရော ကြိုတင်ပြင်ဆင်တာမျိုးရှိလား)

Plan ဆိုတာကတော့ လူတစ်ယောက်က အိမ်ထောင်ပြုတော့မယ်ဆိုရင်  ပညာအရည်အချင်း၊ အလုပ်အကိုင် ဒါမျိုးတော့ ရှိရမယ်။ ကျွန်တော့်ဘက်မှာ ဒါတွေရှိနေတော့ ကိုယ့်ကိုယ်ကိုယုံကြည်တယ်။ မိသားစုအတွက် တာဝန်ကျေနိုင်မယ်ဆိုတာ။ အိမ်ထောင်ပြုတော့မယ်ဆိုတော့ အသက်အရွယ်ကအစ အလုပ်အကိုင် အားလုံးကအိမ်ထောင်ပြုဖို့အတွက် သင့်တော်တဲ့ အနေအ ထားတစ်ခုပါ။

(ယုဇနနဲ့ ဘယ်လိုတွေ့ကြတာလဲ)

သြစတြေးလျမှာ တွေ့တာပါ။ သူနဲ့ကျွန် တော် ရည်းစားသက်တမ်း (၂)နှစ်ကျော်လောက်အကြာမှာ လက်ထပ်ခဲ့ကြတယ်။

(ယုဇနကို ဘ၀လက်တွဲဖော်အဖြစ် ဘယ်လိုအချက်တွေကြောင့် ရွေးချယ်ခဲ့တာလဲ)

အဓိက အချစ်ပေါ့။ ကိုယ်ချစ်တဲ့သူနဲ့ တစ်သက်လုံး နေချင်တယ်။

(ဘ၀လက်တွဲဖော်ကို အချစ်တစ်ခုတည်းနဲ့ ရွေးချယ်ခဲ့တာလား)

တစ်ယောက်နဲ့တစ်ယောက်ကတော့ မတူနိုင်ဘူးပေါ့နော်။ စဉ်းစားတာခြင်း မတူဘူးပေါ့လေ။ ကျွန်တော်ကတော့ အချစ်ကို ဦးစားပေး ရွေးချယ်တယ်။ ယုကလည်း တစ်ကယ်ကိုရိုးသားပြီး ဖြူစင်တဲ့ မိန်းကလေးတစ်ယောက်ပါ။

(အိမ်ထောင်ရှင်မ အလုပ်တွေနဲ့ ပတ်သက်ပြီး ယုဇနမှာ လိုအပ်ချက်ဆိုတာမျိုး ရှိလား)

အရင်တုန်းကတော့ အဆိုတော်ဆိုတော့ အိမ်အလုပ်ကို သူသေသေချာချာ လုပ်ခဲ့တာမျိုးမရှိဘူး။ သူကျွန်တော်နဲ့အတူ သြစတြေးလျမှာ နှစ်ယောက်တည်းနေတော့ သူ့အလိုအလျောက်ပဲ အိမ်ကိစ္စကို တော်တော်ကျွမ်းကျင်သွားတယ်။ အရင်ကထက်ပိုပြီး လုပ်တတ်လာတယ်။

(အိမ်ထောင်ရေး ပြဿနာကို၊ အခက်အခဲတွေကို နှစ်ယောက် ဘယ်လိုဖြေရှင်းလဲ)

ပြဿနာအကြီးအကျယ်တော့ မရှိပါဘူး။ အခက်အခဲလည်း မရှိဘူး။ တစ်ခါတလေ စိတ်ကောက်တာမျိုးပဲ ရှိတယ်။

(အိမ်ထောင်ဦးစီးတွေမှာ တွေ့ရတဲ့အချက်က တစ်ခါတလေမှာ မိသားစုတစ်စုလုံးရဲ့ တာဝန်ကိုယူထားရတဲ့အတွက် ဇနီးအ ပေါ်မှာ ဂရုစိုက်တာ လျော့လာတာမျိုး ရှိကြတယ်)

အဲဒါမျိုးတွေကို ကျွန်တော်လည်း တွေ့ဖူးတယ်။ ချစ်သူဘ၀မှာကျတော့ အချစ်တစ်ခုတည်းခေါင်းထဲမှာ ရှိတာပေါ့နော်။ အိမ် ထောင်ရှင်ဖြစ်လာတဲ့အခါ ကျန်တဲ့ စီးပွားရေး၊ လူမှုရေး၊ မိသားစုရေး အားလုံးကို စဉ်းစားလာရတော့ နည်းနည်းပါးပါး လစ်ဟင်းမှုတွေ ရှိလာတယ်။ အချစ်က လျော့သွားတာတော့ မဟုတ်ဘူး။ ရည်းစားဘ၀ကလိုမျိုးတော့ အချိန်မပေးနိုင်တာ ရှိမယ်။ အဲဒါကို တစ်ခါ တလေကျရင်တော့ အထင်လွဲတာမျိုး ဖြစ်တတ်တာပေါ့နော်။ ဒါပေမဲ့ တစ်ကယ်တမ်းကျတော့ အဓိကတစ်ခြားတာဝန်ယူရမဲ့ ကိစ္စတွေ ပိုများလာလို့ပါ။ ဒါပေမဲ့ တစ်ယောက်နဲ့တစ်ယောက် မင်္ဂလာနှစ်ပတ်လည်တို့၊ မွေးနေ့၊ ချစ်သူများနေ့၊ အဲဒီလိုနေ့မျိုးတွေကို အမှတ် တရရှိနေပြီးတော့ ကိုယ့်အချစ်တွေကို သက်သေပြနေရင်တော့ အကောင်းဆုံးပါ။

(အိမ်ထောင့်တာဝန်ကို နှစ်ယောက်ဘယ်လိုစိတ်မျိုးနဲ့ ခွဲဝေယူသင့်လဲဆိုတာကိုလည်း ပြောပြပေးပါ)

ယောက်ျားလေးဆိုလည်း တစ်ချို့လည်း စီးပွားရှာတယ်ဆိုတာလည်း မိသားစုအတွက် လုပ်နေတာပဲလေ။ မိန်းကလေးက အိမ်ထဲမှာ သားသမီးနဲ့နေမယ်၊ အိမ်ရှင်မတာဝန်တွေ လုပ်မယ်ပေါ့လေ။ ဒါကိုကြည့်ပြီး ဘယ်သူကတော့ တာဝန်ပိုယူရ တယ်ဆိုတာ မျိုးတော့ မပြောသင်ဘူး။ ကျွန်တော့်အမြင်ကတော့ အိမ်ရှင်မတွေလည်း အရင်တုန်းက အယူအဆအတိုင်း အိမ်ထဲမှာနေတာမျိုး မဖြစ်သင့်တော့ဘူးလို့ ထင်တယ်။ ကိုယ့်အစွမ်းအစရှိသလောက် အပြင်ထွက်ပြီး တတ်နိုင်သလောက် အလုပ်လုပ်သင့်တယ်လို့ ထင် တယ်။

(အခုလက်ရှိ လုပ်နေတဲ့ စီးပွားရေအကြောင်း ပြောပေးပါ)

ကျွန်တော့်အလုပ်က Web Application လုပ်တယ်။ သြစတြေးလျမှာ ကျောင်းတက်ပြီး (၇)နှစ်လောက် လုပ်ခဲ့တယ်။ မြန်မာပြည်ပြန်လာတော့ ဒီမှာပဲ အဲဒီအလုပ်ကို ဆက်လုပ်တယ်။ တစ်ခြားစီးပွားရေး ကတော့ Tourism ထဲမှာ နိုင်ငံခြားသားတွေ စီးဖို့အတွက် ပုဂံ၊ မန္တလေး သင်္ဘောကို သူငယ်ချင်း တွေနဲ့ အစုရှယ်ရာလုပ်တာ၊ နောက်တစ်ခုက ယာရာဖက်ရှင်ဆိုပြီး ဖက်ရှင် လုပ်ငန်းလုပ်တယ်။ သူငယ်ချင်းတွေနဲ့အတူ လုပ်နေတဲ့ စီးပွားရေးတွေပါ။ အနုပညာပိုင်းကတော့ ကျွန်တော်အရင်က KB တီးတယ်။ အနုပညာအသိုင်းအ၀ိုင်းနဲ့ ထိတွေ့တယ်။ တစ်ခါတလေ ပွဲတွေရှိရင် တီးတယ်။

(အိမ်ထောင်ရှင်အားလုံးအတွက် နှုတ်ဆက်စကားပြောပေးပါ)

အိမ်ထောင်ရှင်တွေအားလုံး တစ်ယောက်နဲ့တစ်ယောက် နားလည်ဖို့ သစ္စာရှိဖို့၊ ကိုယ့်မိသားစုအပေါ် တာဝန်ကျေဖို့ အရေး ကြီးတယ်။ နှစ်ယောက်ကြားမှာ အခက်အခဲ ပြဿနာမရှိဖို့ အဓိက နားလည်မှုရှိရမယ်။ အမြဲတမ်း ချစ်နေရမယ်။ အချိန်ကြာရင် အချစ်လျော့သွားတာမျိုး မရှိရ အောင် ကိုယ့်အချစ်တွေကို အမြဲတမ်းသက်သေ ပြဖို့လိုအပ်ပါတယ်။

ခင်ပွန်း၊ ဇနီး ဘယ်သူပဲဖြစ်ဖြစ် ကိုယ်တည်ထောင်ထားတဲ့ အိမ်ထောင်ရေးကို တည်မြဲချင်တဲ့ စိတ်ခံယူချက်ခြင်း တူညီကြပါ တယ်။ ဒီတော့နှစ်ယောက်အတူ အလျော့အတင်း၊ နားလည်မှု၊ သစ္စာရှိမှု၊ ကိုယ်ချင်းစာစိတ်တွေနဲ့ အချိုးညီညီလက်တွဲနိုင်မှ တည်မြဲ ခိုင်မာတဲ့ အိမ်ထောင်ရေးတစ်ခု ဖြစ်လာမှာပါ။