ရွှေပုစွန်ရဲရဲနီ၊ ဆားဘဲဥငါးဖယ်လုံးနဲ့ တောကြက်ချဉ်စပ်

အရသာရှိတဲ့ ဟင်းလျာတွေကို စားသုံးရတာဟာ စိတ်ကိုပျော်ရွှင်စေပါတယ်။ အနံ့အရသာမှာရော အပြင်အဆင်မှာပါ သဘော ကျနှစ်သက်စရာလေး ဖြစ်နေမယ်ဆိုရင်တော့ အတိုင်းထက်အလွန်ပါပဲ။ ဒါကြောင့်လည်း Eating in Style ရဲ့ ထုံးစံအတိုင်း စတိုင်လ် ဆန်းနဲ့ဖန်တီးထားတဲ့ ရှယ်အရသာဟင်းပွဲလေးတွေကို ပရိသတ်ကြီးအတွက် တွဲဖက်ပြင်ဆင်ထားပါတယ်။ ပျော်ပျော်ရွှင်ရွှင်နဲ့ သုံးဆောင် ရင်း နှစ်သစ်တစ်ခုကို ပျော်ရွှင်မှုတွေနဲ့ ကြိုဆိုလိုက်ကြရအောင်...။

စားမြိန်စာအဖြစ် စတင်သုံးဆောင်နိုင်မယ့် ဆားဘဲဥငါးဖယ်လုံးကြော်ပွဲလေးဖြစ်ပါတယ်။

ပါဝင်ပစ္စည်း

ဆားဘဲဥ                         - ၂ လုံး

ငါးဖယ်ခြစ်စစ်စစ်               - ၁၀ ကျပ်သား

ကြက်ဥ                           - ၁ လုံး (အကာယူရန်)

ထိုင်းဟင်းအနှစ်                - ၁ ဇွန်း(curry mixture)

ထိုင်းပင်စိမ်း                     - အနည်းငယ်

အုန်းနို့                            - အနည်းငယ်

ပူစီနံ                              - အနည်းငယ်

တောရှောက်ခါးရွက်           - အနည်းငယ်

စပါးလင်                         - အနည်းငယ်

မန်ကျည်းနှစ်                    - အနည်းငယ်

နံနံပင်                            - အနည်းငယ်

ချက်ပြုတ်နည်း

ငါးဖယ်ခြစ်ကို ငရုတ်သီးအနှစ်၊ ကြက်သွန်အဖြူ/အနီအနှစ်တွေပါဝင်တဲ့ ထိုင်း Curry mixture ၊ အုန်းနို့၊ မန်ကျည်းနှစ်၊ စပါးလင်၊ တောရှောက်ခါးရွက်၊ နံနံပင်၊ ပူစီနံတိုနဲ့ သမသွားတဲ့ အထိ ရောမွှေပြီး ကြိတ်ပေးပါတယ်။

ဆားဘဲဥတွေကို အရင်ဆုံး ဆားအနှစ်တွေဖယ်ပြီး ပြုတ်ပါတယ်။ ပြုတ်ပြီးတဲ့အခါ အခွံခွာပြီး ငါးဖယ်အနှစ်မံပါတယ်။ အဲဒီနောက် ကြက်ဥအကာရည်မှာနှစ်ပြီး ဆီပူပူများများနဲ့ ရွှေရောင်သန်းလာတဲ့အထိ ကြော်ပေးပါတယ်။ ထိုင်းပင်စိမ်းကိုလည်း ကြွပ်နေအောင် ကြော် ပေးပါတယ်။ အားလုံးပြီးပြီဆိုရင်တော့ ဆားဘဲဥကြော်ကို လေးခြမ်းစီစိတ်ပြီး အပေါ်ယံက ထိုင်းပင်စိမ်းကြော်ဖြူးကာ ငရုတ်ဆော့စ်နဲ့ လိုက်ဖက်စွာ သုံးဆောင်နိုင်ပြီဖြစ်ပါတယ်။ အခြားတွဲဖက်ပြင်ဆင်နိုင်မယ့် အသီးအရွက်တွေကတော့ သခွားသီး၊ ဆလပ်ရွက်နဲ့ သံပုရာသီး တို့ပဲ ဖြစ်ပါတယ်။

အဓိက ဟင်းလျာအနေနဲ့ ပုစွန်တုပ်ကိုရွေးချယ်ပြီး ရဲရဲနီတဲ့ ရွှေပုစွန်ကြော်ကြွပ်ကြွပ် ဆော့စ်ဆမ်းလေးအဖြစ် ဖန်တီးထားပါတယ်။

ပါဝင်ပစ္စည်း

ပုစွန်တုပ်ကြီး                    - ၁၅ ကောင်

ရွှေပဲသီး                          - ၁၀ ကျပ်သား

ပန်းပွင့်                           - အနည်းငယ်

မုန်လာဥနီ                       - အနည်းငယ်

ငါးအသားလုံး                   - အနည်းငယ်

ငုံးဥ                               - အနည်းငယ်

ဆော့စ်                           - ဇွန်းကြီးတစ်ဇွန်း

ချက်ပြုတ်နည်း

ပုစွန်တုပ်တွေကို အခွံချွတ်သန့်စင်ပြီး မုန့်နှစ်ခပ်ပါးပါးကပ် ဆီပူပူမှာ ရွှေရောင်သန်းလာတဲ့အထိ ကြော်ယူဆီစစ်ထားလိုက်ပါတယ်။

ကြက်သွန်အဖြူ/အနီနဲ့ ငရုတ်သီးအနီကိုထောင်းပြီး ခရမ်းချဉ်သီး၊ နံနံပင်တို့နဲ့အတူ အရသာများထည့်ကာ ဟင်းအနှစ် (ဆော့စ်) ချက်ပါတယ်။ ဆော့စ်ထဲမှာ ငါးအသားလုံးနဲ့ ငုံးဥတွေကိုလည်း ထည့်ချက်ပေးပါတယ်။

ရွှေပဲသီး၊ ပန်းပွင့်နဲ့ ဥနီများကို သင့်တော်သလိုလှီးဖြတ်ပြီး ဆီပူထိုးပေးပါတယ်။

နောက်ဆုံးမှာချက်ထားတဲ့ ဆော့စ်နဲ့ ပုစွန်ကြော်များကို ရောမွှေကြော်လိုက်ပြီး ပန်းကန်ပြားတစ်ချပ်မှာ ထည့်ကာဘေးပတ်လည် ကနေ ဆီပူထိုးထားတဲ့ အသီးအရွက်များနဲ့ ခြံရံအလှဆင်လိုက်တဲ့အခါ ပုံမှာမြင်တွေ့ရတဲ့အတိုင်း စားချင်စဖွယ်လှပနေတဲ့ ရွှေပုစွန်ကြော် ဟင်းတစ်မယ်ကို ရရှိပါပြီ။

အရည်သောက်လေးမပါရင် စားရခက်မှာစိုးလို့ အရသာချိုချိုတောကြက်ကို သီးရွက်အစုံနဲ့ ချဉ်စပ်လေးချက်ထားပါတယ်။

ပါဝင်ပစ္စည်း

တောကြက်                      - ၁ ကောင်

ကောက်ရိုးမှို                     - ၇ လုံး

ခရမ်းချဉ်သီး                    - ၂ လုံး

သံပုရာသီး                       - ၁ လုံး

ကြက်သွန်နီအသေး           - ၃ လုံး

ငရုတ်သီးစိမ်း                   - စိတ်ကြိုက်

စပါးလင်                         - အနည်းငယ်

ပဒဲကော                         - အနည်းငယ်

ကြက်သွန်မြိတ်                 - အနည်းငယ်

တောရှောက်ခါးရွက်           - အနည်းငယ်

နံနံပင်                            - အနည်းငယ်

ထိုင်းငံပြာရည်                  - သင့်ရုံ

ချက်ပြုတ်နည်း

တောကြက်ကိုပြုတ်ပြီး အသားနူးလာတဲ့အခါ အသားများကိုနွှင်ကာ အရိုးကိုမီးအေးအေးနဲ့ အချိုအရသာများထွက်လာတဲ့အထိ ဆက်ပြီး ပြုတ်ထားပေးပါတယ်။ ကောက်ရိုးမှို၊ ခရမ်းချဉ်သီးနဲ့ ကြက်သွန်နီကို လေးစိတ်ကွဲလှီးပြီး တောရှောက်ခါးရွက်၊ နံနံပင်နဲ့ ကြက် သွန်မြိတ်ကို ပါးပါးလှီးပါတယ်။ ငရုတ်သီးစိမ်းများကို မီးသင်းထားပြီး ပဒဲကောကို အတုံးလေးတွေ လှီးပါတယ်။

ကြက်ရိုးပြုတ်ရည်ရတဲ့အခါ စပါးလင်ထုထည့်ပြီး ကြက်သားဖတ်များနဲ့အတူ အသင့်ပြင်ဆင်ထားတဲ့ အသီးအရွက်အားလုံးကို ထည့်ပွက်လိုက်ပါတယ်။ အရသာအနေနဲ့ ထိုင်းငံပြာရည်ကိုအသုံးပြုပြီး ဟင်းရည်လည်းကျက်၊ အပေါ့အငံ လည်းစိတ်ကြိုက်ဖြစ်ပြီဆိုရင် တော့ စားခါနီးမှာ သံပုသီးလေးညှစ်ထည့်ပြီး သုံးဆောင်နိုင်ပါပြီ။ ငရုတ်သီးကြော် နှစ်သက်မယ်ဆိုရင်တော့ လိုက်ဖက်စွာ ထည့်သွင်းနိုင်ပါ ကြောင်း...။